عيد ميلاد سعيد

يوم 25\12 يوم ميلاد شخصين توفوا الى رحمه الله لكن ذكراهم ستظل بيننا الى الابدوهما الاستاذ صلاح جاهين والسيد الرئيس انور السادات

كانت بدايه معرفتى بالاستاذ صلاح جاهين لما كنت بنوته صغيره كان بابا الله يرحمه بيحكيلى عنه وعن اوبريت الليله الكبيره بس ساعتها انا كنت صغيره ومعرفش مين صلاح جاهين ولما كنت في الثانويه العامه كان بيجى برنامج المذيع الرائع احمد العسيلى على مزيكا وكان بيقرا فى اخر كل حلقه رباعيه لصلاح جاهين واخر حلقه في موسم البرنامج استضاف الفنانه ساميه جاهين وقرأوا مع بعض قصيده"على اسم مصر" ومن ساعتها قررت انى اشتري كتب عن صلاح جاهين وبدأت شخصيتى تتأثر بيه وعرفت اد ايه فنان عظيم ورائع

كان اسمه محمد صلاح الدين حلمى واختار اسم جاهين وهو اسم احد اجداده ولد صلاح جاهين 25\12\1930 وعاش طفولته في بيت بطله الاول احمد حلمى احد تلاميذ مصطفي كامل وبطل عظيم ولهذا تربت فيه "الحاسه الشعبيه" وتأثر بعمل والده كقاضٍِِِ فى بعض القضايا المعروفه للفلاحين مثل قضيه "بهوت" التى اثرت بعمق في شخصيته ومن يومها اختار صلاح جاهين ان تتحدث موهبه عن الناس

ادخله والده كليه الحقوق لكنه لم يحب دراسه القانون ودخل كليه الفنون الجميله وعتبر بدايه صلاح جاهين الفنيه مع بدايه ثورة23يوليو وكان شاعر ثوري ويعبر عن رأي الناس ومشاعرهم ومتاعبهم فى حياتهم العاديه وكفاحهم امام المستعمر، وله اعمال كثيره في مجال الفن فقد كتب الكثير من سيناريوهات الافلام والكثير من الاغانى وله اعمال عظيمه ومن اشهرها الرباعيات ،وهو اول فنان يحصل على وسام الدوله للعلوم والفنون من الطبقه الاولى عام1965م

قد توفي صلاح جاهين 21\4\1986

كان رحمه الله شخصيه عظيمه يفيض بالحب والحنان على من حوله وقد اعتبرته ابا روحيا بالنسبه لى وبعد رحيله قال عنه الفنان محمد عبد الوهاب"لم نفقد صلاح جاهين بل فقدنا بموته 20 فناناً منهم الرسام والشاعر والساخر والزجال والقصصى والممثل والسينارست"رحمه الله

اما بدايه معرفتى بالسيد الرئيس انو السادات كانت من خلال كتب المدرسه ومكنتش اعرف عنه اى حاجه لغايه منزل فيلم "ايام السادات"للفنان الجميل اوي احمد زكي الله يرحمه فبدأت اهتم بشخصيه السيد الرئيس انور السادات واشتريت كتاب "البحث عن الذات"وبيتكلم عن قصه حياته بصراحه انا اشتريت الكتاب بالصدفه بس عرفنى حاجات كتير اوى عن الشخصيه العظيمه دي

انور السادات ولد يوم 25\12\1918ولد وتربي في قريه بسيطه اوي وهى"ميت ابو كوم"وهو انسان بسيط ومش متكبر لانه تربي على البساطه وحب الارض وحب مصر والبطولات الشعبيه مثل قصص كفاح مصطفى كامل و موال أدهم الشرقاوى وزهران بطل دنشواى كانت تحكيها له جدته وكانت بالنسبه له سيده عظيمه ويحبها جداً

تربى على قيم اصيله وهى قيم القرية مثل التآخى والتعاون والحب والارتباط بالارض وكان يؤمن انه ينتمى الى الارض و الارض قويه صلبه .. وكل ما ينتمى اليها لابد ان يكون مثلها

كان يكره المستعمر وقد رأى ان القوة هى التى ستخرج الانجليز من ارضنا كان واثقاً من نفسه وعرف طريقه فى الحياة وان السلطة العسكرية هى التى ستتيح له فعل شئ من اجل هذه البلد وتخليصها من المستعمر

كان مثله الاعلى زهران بطل دنشواى وكان يريد ان يحكى الناس قصته كما جعلوا من قصة زهران موال يتغنون به وايضاً عزيز باشا المصرى هذا الرجل المناضل الذى اعجب به السادات كثيراً

وكان السادات لديه حنكه ودهاء سياسى وكان من اعظم القادة لقد كان له شخصيه قوية فى حكمه وصاحب اصرار وارادة عندما علم نفسه عدة لغات بنفسه داخل السجن و ثقف نفسه بنفسه بالكثير من الكتب واصراره على النجاح و تحقيق ذاته لتحقيق كيان هذا البلد وكان صاحب قرار العبور اهم قرار فى تاريخ بلدنا الحبيب

لم يجذبه يوماً بريق الحياة الدنيويه ولم يحاول بناء سعادته على حساب شعبه وانما يتخذ قراراته عن ايمان راسخ لحق الانسان فى الحرية والسلام و المساواه وهذا ما فعله عندما قرر الذهاب الى (فلسطين) للاتفاق على السلام بيننا وبين اسرائيل لحقن الدماء وليحقق لنا السلام

انا شا يفه بجد انه كان شخصية عظيمة وما كانش بيدور على السلطة والشهرة كان بيدور على مصلحة مصر وشعبها الله يرحمه

يوم وفاته كان يوم الاحتفال بالذكرى الثامنه لنصر اكتوبروالاحتفال بعزه مصر توفي 6\10\1981 وفقدنا بموته قائد عظيم ورئيس رائع وانسان متفانى ليحقق لنا ولأرضنا العزه والسلام والرفاهيه رحمه الله واسكنه فسيح جناته

انا عارفه ان انا مهما اتكلمت وكتبت مش هقدر اوفيهم حقهم بس انا حبيت اعبر عن مدي حبى للاستاذ صلاح جاهين والسيد انور السادات في ذكري ميلادهم رحمهم الله

انا بحبهم بجد واتعلمت منهم حاجات كتير

لهم مني كل تقدير واحترام

كل سنه وانتم طيبين

بكره العيد ونعيد وندبحك يا شيخ سيد ونحطك فى الاروانه وندق عليك باخرزانه هيه العيد جه العيد جه

لا انا مش مجنونه بس افتكرت لما كنت بنوته صغيره وكنت انا واخواتى نعد حوالين بابا الله يرحمه ويغنلنا الاغنيه دي ونعد نغنى معاه ونطنطت علشان العيد جه بجد وحشتنى الايام دي اوى عارفين يا جماعه انا كل عيد بتمنى ان ربنا يدينى فلوس كتير اوى علشان اطلع احج واخد معايا ماما واخواتى واحمد خطيبي وكل الناس اللى بحبهم وهما بيحبونى علشان انا فاطمه وان شاء الله ربنا يحققلى الامنيه ديه ادعولى

وكل سنه وانتم طيبين وربنا يعيده على كل المسلمين بالخير

واللى نفسه في حاجه ربنا يحققهاله اللهم امين

هي فوضي؟

صباح النور على عيون كل مصري على وجه الارض
انا ياجماعه دخلت فيلم هى فوضي ومش عارفه اقولكم ايه الفيلم رائع جدا الفنان خالد صالح بجد ابدع ومن ساعة ما دخلنا السينما والناس بتصفق على روعه ادئه الجميله وبجد الواحد حس ان الفيلم بيمس واقع اليم فى مجتمعنا الفيلم بيحكى على ان الاستاذ خالد صالح اوحاتم امين شرطه وبيستغل نفوذه فى ابتزاز الناس وتعذيب المساجين وبيحب جارته منه شلبى او نور بس هى مش بطيقه وبتحب ابن الناظره بتاعت المدرسه اللى بتشتغل فيها مدرسه اللى هو يوسف الشريف او شريف فى الفيلم وبيشتغل وكيل نيابه ولما حاتم مش بيلاقي فايده فى نور بيغتصبها علشان توافق عليه بس هى مش بتسكت وشريف بيقف جنبها علشان تجيب حقها وفى الاخر كل حاجه عملها حاتم بتتكشف وبيطلب القبض عليه وبيضرب نفسه بالرصاص قدام الناس كلها بس بجد لازم تتدخلوا الفيلم وتشوفوا روعه تفاصيله وروعه اخراجه والاداء التمثيلى الرائع رغم ان فيه بعض السب في احداث الفيلم بس ده ما يمنعش ان الفيلم تحفه بس العيب الوحيد اللى انا شفته في الفيلم في مشهدين لما شريف بيبقي راكب العربيه المنظر وراه متركب على المشهد وكمان لما حتم بيبقى ماشي بالموتوسيكل المشهد وراه متركب وبتحس ان في حاجه غلط
كمان ياجماعه فى مشكله احنا عندنا افلام حلوه اوى ومع ذلك بنقول الافلام الاجنبي احلا انا كمان بحس ان الافلام الاجنبي رائعه بس فى نفس الوقت شايفه ان افلامنا كويسه اى نعم مش كلها بس معظمها حلو ليه دايما نقول ان السينما عندهم احسن من عندنا بس بجد انا شايفه ان عندنا مستقبل كويس بدائنا نمشي فيه لتطوير افلامنا

--------------------------------

هو ليه العلاقات بين الاقارب بقت بعيده اوى كده ليه دايما انت اللى لازم تسأل عليهم ولو مسألتش ميسألوش ويعاتبوك ويقولو انك ما بتسألش بجد يا جماعه الموضوع ده بيضايقنى اوى بحس ان الواحد مالوش قيمه اوى كده ان حد يسأل عليه بس اللى بيهون عليا الامر ان الواحد هياخد ثواب على سؤاله رغم انى كتير بزعل وبقول مش هسأل وبدأت اعمل الموضوع ده وربنا يسامحنى

موقف جدع مووووووووووت

صباح الخير على عيون كل مصري انا يا جماعه حصل معايا موقف حلو اوى لازم احكلكوا عليه انا انهارده كنت مع ماما بنحيب دقيق علشان رقاق العيد وكل سنه وانتوا طيبين وكان معانا حاجات ازاز كتير ووقفنا تاكسي وماما طلبت من واحد واقف انه يساعدنا فى حط الحاجه فى التاكسي فكان فى راجل كبير معدي وسمع ماما من غير ما نطلب منه شال الحاجه وحطها في التاكسي وانا دخلت التاكسي وبقفل الباب لقيته هو اللى بيقفلى الباب بمنتهى الذوق والاحترام وانا بقوله شكرا ابتسم ابتسامه انا مش ممكن انساها فيها معانى كتير وكانه بيقول يا بنتى انا مصري يعنى الشهامه والاصاله وبجد انا حسيت من قلبى ان مصر لسه بخير طول ما فيها ناس كده

• ثانيا يا ناااااااااااااااااااااااس يا اهالى المحروسه الكرام الفنان المصري الجامد على الالفي عند حفله يوم 6\12مع فرقه ايامنا الحلوه في فرع الساقيه التانر وادي رقم الساقيه لاي استفسار37368881 نتمنى ان الكل يكون موجود والحاضر يعلم الغايب

عجبت من هذا الحب

• اولا احب اشكر احب شخص على قلبى واللى الهمنى الكلام ده من غير ما ياخد باله

قال لها احبك فتمنعت

قال لها انى ادوب عشقا

فامتنعت عن الرد

انى لا استطيع ان احيا بدونك

لماذا تعاملينى هكذا؟

قالت انا ايضا احبك

ولكنى اخاف ان نفترق

قال لماذا؟

قالت انى اخاف على حبنا

من تقلب الزمان

اخاف عليه من مرور الايام

اخاف ان ينهار امام الصعاب

قال لكن حبنا سيدوم الى الابد

قالت

دعنى واذهب بعيداً قبل ان يسكن الندم قلبك

ويوقظك من نومك فلا تجد مفر

قال لها

انى اتمسك بك لأخر يوم في عمري

فانتِ من عشقها قلبى

ووقف في وسط الميدان

وقال بصوت يعلو فوق كل الاصوات

احبك

"عجبت لهذا الحب"

كلام كتير

معلش يا جماعه انا اول كلامى كان ان انا مليش اصحاب وكلام كتير محبط سامحونى انا دلوقتى عاوزه اعرفكم على نفسي انا اسمى فاطمه في كليه الآداب قسم تاريخ بحب التمثيل وبحب اسمع اغانى واقعد اغنى رغم ان صوتى وحش وبحب الموسيقي اوى وبحب اللغات والترجمه انا مخطوبه لزميلى في الجامعه وسبب ارتباطنا فيلم افريكانو بحب مصر اوى ونفسي تبقي احلى لانها بجد تستاهل تبقي احلى وناسها يستاهلوا انهم يكونوا افضل بس بجد انا مش عارفه ايه سبب حبى لمصر بس بحبها كده وخلاص وبحب صلاح جاهين وبحب كلامه لانه فعلا عبقري ومهما اتكلمت عنه مش هوفيه حقه الله يرحمه انا بعد الكلام الكتير ده عاوزه اقول لكم بكره تروق وتحلى وللحديث بقيه

وسمعنى احلى سلام

انا عاوزه فى بدايه كلامى انى اشكر الفنان على الالفي والجميله وينكى لان مدوناتهم ادتنى الامل ان الدنيا حلوه اوى رغم ان فيها لحظات صعبه انا كمان بحب الدنيا اوى بس انا مشكلتى الوحيده انى ماليش اصحاب او بمعنى اصح عندي ناس كتير حواليا ممكن اسميهم زمايل وممكن كلمه زمايل دي تبقي كتير اوى عليهم لان كل علاقتهم بيه تقتصر على السلام داخل الجامعه وشويه كلام معايا وبعد كده اتركن على الرف وممكن بعضهم يفتكرنى فى المناسبات ويسلم عليا انا مش من طبعي اشتكى بس الواحد لما بيفيض بيه بيحب يتكلم وانا مش وحشه لان ناس كتير بيقولوا عليا جدعه و100 راجل علشان كده بستغرب يا تري انا فعلا هما مش بيحبونى ولا مش هما دول اصحابي بجد المهم انا اسفه صدعتكوا بماشكلى وسمعنى احلى سلاااااااااااااااااااااااااااااااااااام لعلى ووينكى

اول الكلام سلام

الى كل الناس المدونين اولا مساء الخير عليكم انا اول مره يكون ليه مدونه واول مره ادخل عالم التدوين وان شاء الله موضوعاتى تعجبكم وتفيدكم وتكون البدايه كويسه لينا كلنا