رمضان كريم ....الله اكرم

كل سنه وانتم جميعا بخير وبصحه وسعاده ويجعل رمضان السنه دى سعيد على كل المسلمين ويجعله شهر خير ورحمه ومغفره

وفى فكره انا اخدها من مدونه شقاوه اخر حاجه اللى واخدنها من مدونه شيكولاته اكرمهم الله جميعا وجزاهم كل خير وهيه ان كل واحد يكتب هدفه ونفسه يعمل ايه فى رمضان ويكتبه فى ورقه تكون فى مكان قدام عينه على طول ويحاول ينفذ هدفه اتمنى ان كل الناس تقدر تحقق هدفها على اخر رمضان وتستمر الطاعات الى ما بعد رمضان

لاتنسونى انا وكل المسلمين من خالص دعواتكم

اعتذار

• 
  
  اعتذار الى الشخص الذى احببته منذ ان عرفته لا اعرف اذا كنت ستقرأ هذا الكلام ام لا ولكن اذا قرأته اود ان تعرف انى احببتك واحبك وسأظل احبك حتى اخر ايام حياتى واريدك ان تعرف انك كنت كل ما لى في هذه الدنيا كنت بمثابه خطيبى و اخى وصديقى وزميلى وطفلى الصغير وكنت ستصير زوجى ولكنه القدر وانا اكتب هذا لانى لم استطع ان اقول كل هذا فى اخر كلام لى معك وفى اغنيه سمعتها بعد فراقنا تعبر عما كنت اريدك ان تعرفه وهيه :

مكنتش ناوى اودعك بس انت ما فهمتش ومشيت وما حاولتش تسمعنى او اسمعك دا انا كنت لسه بكلمك وبقولك ايه فيه صعبتها عليه معرفتش افهمك انا ليه ساعتها مجاش فى بالى كلام لحظه ما قلت سلام ليه سكت جرالى ايه ازاى اسيبك تمشي كدا على طول وانت اللى كنت بقول م الدنيا طلعت بيه

دا انا لوعليه يا حبيبى عاوزك هنا جنبى ومفيش حاجه فى قلبي يا ريت تفهم كدا لاحبى ليك عمره انتهى ولا قلت نتفارق انت اللى بتفارق اوهام وخلقتها انا ليه ساعتها مجاش فى بالى كلام لحظه ما قلت سلام ليه سكت جرالى ايه ازاى اسيبك تمشي كدا على طول وانت اللى كنت بقول م الدنيا طلعت بيه

وكان نفسي كل المشاكل اللى بينا تتحل ومتكنش دى النهايه بس للاسف خلاص

وقدر الله وما شاء فعل وانا عن نفسي هتمنالك الخير من كل قلبى علشان تستاهل زى ما قالت انغام وانا اسفه اذا كنت جرحتك او اذيتك فتره خطوبتنا.بس عاوزاك تعرف انك اغلى ما لى في الدنيا.

انهارده عيد ميلادك كل سنه وانت طيب دى اول سنه مقدرش اتصل بيك واقولك كل سنه وانت طيب

فلسطين

يارب انصر اخوتنا في فلسطين وجمع امتنا العربية واصلح حالها وانصر اخواننا في غزه

رمضان يجمعنا

وحشتونننننننننننى اوى يا اصحابى ووحشنى التدوين ووحشتنى صفحات المدونين
المهم انا جيت دلوقتى وقلت اهل عليكم قبل هلال رمضان علشان اقول لكم كل سنه وانتم طيبين وربنا يعود عليكم الايام بخير ويكون رمضان السنه دى شهر حسنات لينا كلنا ويا ريت كلنا يا جماعه نواظب على العباده لان هو رمضان واحد فى السنه ومش لازم يضيع من ايدينا
ربنا يجعل رمضان السنه دي جامع لينا الخير ومجمعنا دايما على حب الله ونصره رسولنا الحبيب

مواقف تضايق

مواقف غلط كتيروتضايق حصلت قدامى عاوزه احكلكم عليها وتقولولى رأيكم فيها بصراحه

كنا في رمضان وبتكلم انا واختى باليل وبقولها*

اتصدقى الدنيا بتبقي حلوه اوى في رمضان والشوارع امان والواحد بيمشي فى الشارع مش خايف من حاجه والواحد بيبقي مستريح من المعاكسات الرخامه

تانى يوم الصبح وانا ماشيه في الشارع شويه شباب كانوا عمالين يعاكسوا ولما رحت الجامعة اللى الواحد بيبقي فيها على راحته وبيحس انه وسط اخواته شويه شباب اعدوا يعاكسونى انا واصحابي المعاكسه في اى وقت حرام وبضايق بس في رمضان كمان بأم يعاكسوا

المفروض البنات على كده تعمل صناديق حديد علشان تمشي فيها ومحدش يضايقها لانهم مبقوش رحمين لاحلوه ولا وحشه حتى المحجبات والمنتقبات مش مرحومين من المعاكسه

الموقف التانى*

كنت في المصيف مع ناس قريبي وولادهم الصغيرين وكان معانا ولدين صغيرين قريبين من بعض في السن ولد عنده 3 سنين ولد عسول وهادي على طول ومش بيتشاقي وابن خاله 4سنين ولد عسول بس شقي شويه وقريبي كانوا بيقلوا للولد اللى عنده 4 سنين الولد التانى احسن منك وشاطر وهيدخل الجنه وانت هتدخل النار تخيلوا يا جماعة طفل تقولولوا كده هيعمل ايه طبعا الولد ده كان بيعد يعيط ويضرب الولد الصغير رغم ان الولد الصغير بيحبه جدا وهما كده يكرهوا الولد في ابن خالته والولد التانى مالوش ذنب

الموقف التالت*

اعرف بنت محترمه جدا وطموحتها كبيره بس المشكله ان مامتها دايما شايفه ان ولاد عمها احسن منها وكتير بتقولها بصي لولاد عمك ياريتك تبقي زيهم عالطول هما كويسين ولافتين انتباه مامتها ودي في حد ذاتها حاجه غلط لان البنت رغم انها بتحب ولاد عمها لكن كل ما تشوفهم بتحس جواها انها بتكرهم جدا وهما مالهومش ذنب غير ان مامتها من الاول حسبت الموضوع غلط دي بنتى المفروض انى اشجعها انها تكون نفسها وتحقق احلامها يمكن تبقى احسن من اللى حواليها

ومواقف تانيه كتير زى اللى يضرب اويشتم ولاده قدام الناس فى الشارع واللى يقلل دايما من شأنهم قدام الناس

او اللى يعلموا ولادهم ان الكدب حرام ويلاقيهم بيكدبوا وما يبقاش عارف ايه الصح وايه الغلط

وحاجات تانيه كتير..............

الرابط بين المواقف دي كلها الاهل

الاهل اللى بيربوا ولادهم على انك راجل ميعبكش حاجه كلم دي وامشي مع دي وعاكس دي ومابيفكروش انهم عندهم بنات وداين تدان ولو بعد حين

والاهل برضوا اللى بيقارنوا بين ولادهم وبين اللى حواليهم ومش بيفكروا ان ابنى ده او بنتى عندهم احلامهم وطموحاتهم ولازم يبقوا نفسهم مش نسخه لحد تانى

طبعا احيانا بيبقي السبب في بعض المواقف الاولاد نفسهم لانهم بيبعدو عن الطريق الصح

واحيانا تانيه الاولاد بترفض تربيه اهلهم الغلط وبيبنوا شخصيتهم بنفسهم

وطبعا انا مابقولش كل الاهالى وحشين لان في اهالى كويسين جدا وبيبقوا اصحاب ولادهم اوى وبيبنوا شخصيات صالحه وناجحه

انا اللى عاوزه اقوله من المواقف دي كلها ان انا بيصعب عليا ان الاهل يكونوا سبب فى تعاسه ولادهم وضياع شخصيتهم المفروض بين الاهالى وولادهم حب وحنيه وصراحه وان الاهل يدوا ولادهم جزء من وقتهم ويشاركوهم في اهتمامتهم لان في الاول وفي الاخر دول ولادي اللى هيشرفونى

عيد ميلاد سعيد

يوم 25\12 يوم ميلاد شخصين توفوا الى رحمه الله لكن ذكراهم ستظل بيننا الى الابدوهما الاستاذ صلاح جاهين والسيد الرئيس انور السادات

كانت بدايه معرفتى بالاستاذ صلاح جاهين لما كنت بنوته صغيره كان بابا الله يرحمه بيحكيلى عنه وعن اوبريت الليله الكبيره بس ساعتها انا كنت صغيره ومعرفش مين صلاح جاهين ولما كنت في الثانويه العامه كان بيجى برنامج المذيع الرائع احمد العسيلى على مزيكا وكان بيقرا فى اخر كل حلقه رباعيه لصلاح جاهين واخر حلقه في موسم البرنامج استضاف الفنانه ساميه جاهين وقرأوا مع بعض قصيده"على اسم مصر" ومن ساعتها قررت انى اشتري كتب عن صلاح جاهين وبدأت شخصيتى تتأثر بيه وعرفت اد ايه فنان عظيم ورائع

كان اسمه محمد صلاح الدين حلمى واختار اسم جاهين وهو اسم احد اجداده ولد صلاح جاهين 25\12\1930 وعاش طفولته في بيت بطله الاول احمد حلمى احد تلاميذ مصطفي كامل وبطل عظيم ولهذا تربت فيه "الحاسه الشعبيه" وتأثر بعمل والده كقاضٍِِِ فى بعض القضايا المعروفه للفلاحين مثل قضيه "بهوت" التى اثرت بعمق في شخصيته ومن يومها اختار صلاح جاهين ان تتحدث موهبه عن الناس

ادخله والده كليه الحقوق لكنه لم يحب دراسه القانون ودخل كليه الفنون الجميله وعتبر بدايه صلاح جاهين الفنيه مع بدايه ثورة23يوليو وكان شاعر ثوري ويعبر عن رأي الناس ومشاعرهم ومتاعبهم فى حياتهم العاديه وكفاحهم امام المستعمر، وله اعمال كثيره في مجال الفن فقد كتب الكثير من سيناريوهات الافلام والكثير من الاغانى وله اعمال عظيمه ومن اشهرها الرباعيات ،وهو اول فنان يحصل على وسام الدوله للعلوم والفنون من الطبقه الاولى عام1965م

قد توفي صلاح جاهين 21\4\1986

كان رحمه الله شخصيه عظيمه يفيض بالحب والحنان على من حوله وقد اعتبرته ابا روحيا بالنسبه لى وبعد رحيله قال عنه الفنان محمد عبد الوهاب"لم نفقد صلاح جاهين بل فقدنا بموته 20 فناناً منهم الرسام والشاعر والساخر والزجال والقصصى والممثل والسينارست"رحمه الله

اما بدايه معرفتى بالسيد الرئيس انو السادات كانت من خلال كتب المدرسه ومكنتش اعرف عنه اى حاجه لغايه منزل فيلم "ايام السادات"للفنان الجميل اوي احمد زكي الله يرحمه فبدأت اهتم بشخصيه السيد الرئيس انور السادات واشتريت كتاب "البحث عن الذات"وبيتكلم عن قصه حياته بصراحه انا اشتريت الكتاب بالصدفه بس عرفنى حاجات كتير اوى عن الشخصيه العظيمه دي

انور السادات ولد يوم 25\12\1918ولد وتربي في قريه بسيطه اوي وهى"ميت ابو كوم"وهو انسان بسيط ومش متكبر لانه تربي على البساطه وحب الارض وحب مصر والبطولات الشعبيه مثل قصص كفاح مصطفى كامل و موال أدهم الشرقاوى وزهران بطل دنشواى كانت تحكيها له جدته وكانت بالنسبه له سيده عظيمه ويحبها جداً

تربى على قيم اصيله وهى قيم القرية مثل التآخى والتعاون والحب والارتباط بالارض وكان يؤمن انه ينتمى الى الارض و الارض قويه صلبه .. وكل ما ينتمى اليها لابد ان يكون مثلها

كان يكره المستعمر وقد رأى ان القوة هى التى ستخرج الانجليز من ارضنا كان واثقاً من نفسه وعرف طريقه فى الحياة وان السلطة العسكرية هى التى ستتيح له فعل شئ من اجل هذه البلد وتخليصها من المستعمر

كان مثله الاعلى زهران بطل دنشواى وكان يريد ان يحكى الناس قصته كما جعلوا من قصة زهران موال يتغنون به وايضاً عزيز باشا المصرى هذا الرجل المناضل الذى اعجب به السادات كثيراً

وكان السادات لديه حنكه ودهاء سياسى وكان من اعظم القادة لقد كان له شخصيه قوية فى حكمه وصاحب اصرار وارادة عندما علم نفسه عدة لغات بنفسه داخل السجن و ثقف نفسه بنفسه بالكثير من الكتب واصراره على النجاح و تحقيق ذاته لتحقيق كيان هذا البلد وكان صاحب قرار العبور اهم قرار فى تاريخ بلدنا الحبيب

لم يجذبه يوماً بريق الحياة الدنيويه ولم يحاول بناء سعادته على حساب شعبه وانما يتخذ قراراته عن ايمان راسخ لحق الانسان فى الحرية والسلام و المساواه وهذا ما فعله عندما قرر الذهاب الى (فلسطين) للاتفاق على السلام بيننا وبين اسرائيل لحقن الدماء وليحقق لنا السلام

انا شا يفه بجد انه كان شخصية عظيمة وما كانش بيدور على السلطة والشهرة كان بيدور على مصلحة مصر وشعبها الله يرحمه

يوم وفاته كان يوم الاحتفال بالذكرى الثامنه لنصر اكتوبروالاحتفال بعزه مصر توفي 6\10\1981 وفقدنا بموته قائد عظيم ورئيس رائع وانسان متفانى ليحقق لنا ولأرضنا العزه والسلام والرفاهيه رحمه الله واسكنه فسيح جناته

انا عارفه ان انا مهما اتكلمت وكتبت مش هقدر اوفيهم حقهم بس انا حبيت اعبر عن مدي حبى للاستاذ صلاح جاهين والسيد انور السادات في ذكري ميلادهم رحمهم الله

انا بحبهم بجد واتعلمت منهم حاجات كتير

لهم مني كل تقدير واحترام

كل سنه وانتم طيبين

بكره العيد ونعيد وندبحك يا شيخ سيد ونحطك فى الاروانه وندق عليك باخرزانه هيه العيد جه العيد جه

لا انا مش مجنونه بس افتكرت لما كنت بنوته صغيره وكنت انا واخواتى نعد حوالين بابا الله يرحمه ويغنلنا الاغنيه دي ونعد نغنى معاه ونطنطت علشان العيد جه بجد وحشتنى الايام دي اوى عارفين يا جماعه انا كل عيد بتمنى ان ربنا يدينى فلوس كتير اوى علشان اطلع احج واخد معايا ماما واخواتى واحمد خطيبي وكل الناس اللى بحبهم وهما بيحبونى علشان انا فاطمه وان شاء الله ربنا يحققلى الامنيه ديه ادعولى

وكل سنه وانتم طيبين وربنا يعيده على كل المسلمين بالخير

واللى نفسه في حاجه ربنا يحققهاله اللهم امين