الثلاثاء، 8 يناير 2008

مواقف تضايق




مواقف غلط كتيروتضايق حصلت قدامى عاوزه احكلكم عليها وتقولولى رأيكم فيها بصراحه



كنا في رمضان وبتكلم انا واختى باليل وبقولها*



اتصدقى الدنيا بتبقي حلوه اوى في رمضان والشوارع امان والواحد بيمشي فى الشارع مش خايف من حاجه والواحد بيبقي مستريح من المعاكسات الرخامه



تانى يوم الصبح وانا ماشيه في الشارع شويه شباب كانوا عمالين يعاكسوا ولما رحت الجامعة اللى الواحد بيبقي فيها على راحته وبيحس انه وسط اخواته شويه شباب اعدوا يعاكسونى انا واصحابي المعاكسه في اى وقت حرام وبضايق بس في رمضان كمان بأم يعاكسوا



المفروض البنات على كده تعمل صناديق حديد علشان تمشي فيها ومحدش يضايقها لانهم مبقوش رحمين لاحلوه ولا وحشه حتى المحجبات والمنتقبات مش مرحومين من المعاكسه



الموقف التانى*



كنت في المصيف مع ناس قريبي وولادهم الصغيرين وكان معانا ولدين صغيرين قريبين من بعض في السن ولد عنده 3 سنين ولد عسول وهادي على طول ومش بيتشاقي وابن خاله 4سنين ولد عسول بس شقي شويه وقريبي كانوا بيقلوا للولد اللى عنده 4 سنين الولد التانى احسن منك وشاطر وهيدخل الجنه وانت هتدخل النار تخيلوا يا جماعة طفل تقولولوا كده هيعمل ايه طبعا الولد ده كان بيعد يعيط ويضرب الولد الصغير رغم ان الولد الصغير بيحبه جدا وهما كده يكرهوا الولد في ابن خالته والولد التانى مالوش ذنب





الموقف التالت*



اعرف بنت محترمه جدا وطموحتها كبيره بس المشكله ان مامتها دايما شايفه ان ولاد عمها احسن منها وكتير بتقولها بصي لولاد عمك ياريتك تبقي زيهم عالطول هما كويسين ولافتين انتباه مامتها ودي في حد ذاتها حاجه غلط لان البنت رغم انها بتحب ولاد عمها لكن كل ما تشوفهم بتحس جواها انها بتكرهم جدا وهما مالهومش ذنب غير ان مامتها من الاول حسبت الموضوع غلط دي بنتى المفروض انى اشجعها انها تكون نفسها وتحقق احلامها يمكن تبقى احسن من اللى حواليها





ومواقف تانيه كتير زى اللى يضرب اويشتم ولاده قدام الناس فى الشارع واللى يقلل دايما من شأنهم قدام الناس



او اللى يعلموا ولادهم ان الكدب حرام ويلاقيهم بيكدبوا وما يبقاش عارف ايه الصح وايه الغلط



وحاجات تانيه كتير..............



الرابط بين المواقف دي كلها الاهل



الاهل اللى بيربوا ولادهم على انك راجل ميعبكش حاجه كلم دي وامشي مع دي وعاكس دي ومابيفكروش انهم عندهم بنات وداين تدان ولو بعد حين



والاهل برضوا اللى بيقارنوا بين ولادهم وبين اللى حواليهم ومش بيفكروا ان ابنى ده او بنتى عندهم احلامهم وطموحاتهم ولازم يبقوا نفسهم مش نسخه لحد تانى



طبعا احيانا بيبقي السبب في بعض المواقف الاولاد نفسهم لانهم بيبعدو عن الطريق الصح



واحيانا تانيه الاولاد بترفض تربيه اهلهم الغلط وبيبنوا شخصيتهم بنفسهم



وطبعا انا مابقولش كل الاهالى وحشين لان في اهالى كويسين جدا وبيبقوا اصحاب ولادهم اوى وبيبنوا شخصيات صالحه وناجحه



انا اللى عاوزه اقوله من المواقف دي كلها ان انا بيصعب عليا ان الاهل يكونوا سبب فى تعاسه ولادهم وضياع شخصيتهم المفروض بين الاهالى وولادهم حب وحنيه وصراحه وان الاهل يدوا ولادهم جزء من وقتهم ويشاركوهم في اهتمامتهم لان في الاول وفي الاخر دول ولادي اللى هيشرفونى

هناك 32 تعليقًا:

طبيبك الخاص يقول...

بسم الله الرحمن الرحيم.الموضوع جميل والغريب فعلا من بعض الاهل انهم يقللوا من شان وقدر ابنائهم...بالرغم انهم اقرب الناس ليهم.زازاى مع انهم اقرب الناس واللى المفروض يقفوا جنبى لو عندى مشكله الابن او البنت بيفاجا بعكس كده خالص ومش بيلاقى غير التثبيط والكلام اللى يوجع ويهين وده بيعمل مشكله خاصه لو ان الابن طفل لسه صغير ف السن ممكن الاهل يزرعوا فيه كره ناس قريبه منه وهما مش واخدين بالهم...المفروض ان نشجع اولادنا ونزرع فيهم حب الناس مش نزرع فيهم الكراهيه والبغضاء واللى هتنعكس بالضروره على شخصيتهم لما يكبروا هيفقدوا الحب وبالتالى فاقد الشى لا يعطيه يبقا الاهل زرعوا فيه عدم الحب وبالتالى الولد لما كبر ولانه فقد الحب مش هيقدر يحب ااهله....يارب الناس كلها تعلم اولادها انها تعيش دايمن باجمل شى ف الوجود وهو الحب خب الله والرسول والوطن والاهل.........الموضوع جميل واتمنالك السعاده تحياتى

§a§a يقول...

فعلا الاهل بتبقى السبب فى بعض الاحيان والبعض الاحيان السبب فى الشخص نفسه

هو فعلا عامل كبير جدا على التربيه اللى هى اساس الانسان لو الانسان تربى على القيم والاخلاق والدين

اكيد فى حاجات كتير هتختفى من مجتمعنا ذى المعاكسات اللى بقت فى كل الاوقات حتى فى افضل الشهور والايام


كمان المفروض ان الاهل لا تقارن بين اولادها واولاد الغير او الاقارب

لان انا مثلا تفكيرى بيختلف عن تفكير صديقى او قريبى او غيرى

لان كل واحد وليه تفكيرة او ليه ميوله

يعنى انا ميولى ومواهبى غير مواهب غيرى

فممكن ابع فى شىء واصبح الاول فيه وغيرى لا يستطيع فعل هذا الشىء او اتقانه

على العكس تماما

يعنى الحكايه متفاوته بين انسان وانسان

بوست جميل

تحياتى

di el2mr يقول...

موضوع جميل
بس اسمحيلى هو مش موضوع عو موااضيع
لان كل موقف من دول عايز موضوع لوحدة
بس عامه
فعلا اوقات الاهل عن غير قصد بيكونو سبب فى فشل اولادهم وتعاستهم
ودة لانهم بيحاولو يحققو ذاتهم اللى هما فشلو فى تحقيقها من خلال ولادهم
بغض النظر عن الاولاد دول عايزين ايه او بيحلمو بايه
ودى على ما اظن اكبر غلطه بيقع فيها الاهل
وبتكون سبب اساسى لفشلم فى حياتهم بعد كده

اما موضوع مقارنه الاولاد باولاد تانيين
فهتلاقى ان دة مش عيب من الاولاد
دة عيب من الاهل نفسهم وبيوضح نقص فى شخصيه الاهل (الاب والام)
لان الاولاد دول زى الزرع يعنى اللى الاب والام بيلاقوة من ولادهم هو اللى هما زرعوة بايدهم

بصى هو الموضوع كبيييييير وعايز كلام كتير
فكفايه كده لانى رغيت كتير وزمانى صدعتك

صالح سعيد يقول...

السلام عليكم
ازيك وكل سنه وانتى طيبه
ويا رب تحققى كل احلامك فى العام الجديد
وانا معاكى فى الانسان بيعبر عن البيئه بتاعته وكما يقولون كل اناء ينضح بما فيه
وبجد بوست هايل
وربنا يوفقك
ومستنى رايك فى البوست الجديد بتاعى

بسمه عبدالباسط يقول...

موضوع مهم والأجمل أنه فعلا حقيقى وموجود حوالينا وفى واقعنا
وفعلا بتبقى مشكلة كبيرة لما الأهل يحاولوا يقللوا من أولادهم قدام الناس وكمان لما يحسسوهم بأنهم مالهمش قيمة وسط الناس
ولما بيعلموهم صفات كتير غلط زى الكدب وغيره وغيره
يعنى مثلا لما تلاقى اب موجود فى البيت ويقول لابنه لو التليفون رن قول أنى مش موجود وهو موجود يبقى هو كده بيعلمه الكدب
وحاجات كتير كل الناس بتعملها
بس ياريت فعلا نلاقى لها حقوق واقعية وعملية

تحياتى لكى

بحبك يامصر يقول...

انا شايف ان الاهل فعلا بيكونوا مؤثرين فى شخصيات اولادهم سواء بالسلب او بالايجاب
والسبب فى التأثير اللى بالسلب اما بيكون عن جهل بأصول التربيه او عن اهمال التربيه
والاهمال بيكون يا اما مفيش وقت عشان لقمة العيش وكده يا اما اهمال للاهمال يعنى مش فى بالهم اساسا انهم بيربوا ام او اب للمستقبل هيكونوا نواه لمجتمع بيهم هيكون مجتمع صالح او مجتمع فاسد او مجتمع مهمل غير مرتب

šσяšαяαα يقول...

السلاااااااام عليكممم

ايه الجمال دا كله ماشاء الله عليكى

ويارب فعلا الاباء ياخدو بالهم من التصرفات دى ويحاسبوا نفسهم الاول هل التربية دى سليمة واللا لا

ربنا يبارك فيكى ياعسولى ويوفقك

تحياتى ليكى

قلوب حائرة يقول...

تعرفي انتي اثرتي موضوع هام جدا اهلنا كتير بيبقوا فاكرين انهم صح وهما بيربونا باساليبهم وهما للاسف بيهدونا مش بيبنونا نفسي يفكروا في الكرم قبل ما يقوله علشان بيبقي ليه اثر كبير في حياتنا بعد كده

فى القلب يقول...

عارفه يا توتا

أكترحاجه فرحتنى وأنا بقراء أن أم المستقبل على درجه عاليه منالوعى


ياريت كل بنتنا أوحتى أغلبهم بيفكروا بالوعى ده

دمتى بألف خير وتألق

Unknown يقول...

حمد الله ع السلامة يا توتا

حكاية المعاكسة بقت زى الوباء المنتشر للأسف و فى رأى انا الوباء احسن لان فيه امل يتعالج

للأسف الأهالى دايما بيبقوا سبب العقد و خصوصا الى يدخلوا فى مستقبل ابناءهم تحت بند انهم خايفيين عليهم و عارفين مصلحتهم و يعدوا يعريهم شوفى فلانة عملت كذا و فلانة عملت كذا طب ما كل واحد و قدرته و ميوله


موضوع جميل اوى
تحياتى

tota_fm يقول...

طبيبك الخاص

انا سعيده بزيارتك المدونه انا متفقه معاك في كلامك بس عندي اعتراض صوغنتوت احيانا الناس اللى بيتحرموا من الحب بيكونوا احن ما يمكن دا طبعا مش كلهم بس الاغلبيه اللى اتعملت معاهم كانوا كده وبجد اعظم حاجه فى الدنيا ان الواحد يربي ولاده على حب الله ورسوله لانه اسمى حب وحب الوطن والاهل علشان يحس بكيانه ووجوده

ربنا يكرمك

صاصا
منورنى يا برنس التاريخ كله انا متفقه معاك في كلامك والمشاكل معظمها بسبب التربيه الغلط وغياب الاخلاق

ربنا يوفقك

عروس البحر يقول...

انا سعيدة جدا باكتشاف مدونتك الرائعة و بالنسبة للمعاكسات
ده للفضيين اللي مورهمش حاجة

Unknown يقول...

أيه يا توتا مش عادتك تغيبى كده خير ان شاء الله ؟

tota_fm يقول...

ضى القمر

منورانى يا جميله دايما فعلا هو كذا موضوع بس انا حبيت اعرض المواقف المختلفه اللى حصلت قدامى علشان لما فكرت فيها لقيتها سببها حاجه واحده فى الاساس وهى الاهل وانا متفقه معاكى في كل اللى قلتيه وفعلا الموضوع كبير اوى وبالعكس يا جميله انا مبسوطه جدا بتعليقك
وربنا يكرمك

صالح سعيد
وانت طيب وبالصحه والسلامه
امين يارب ويحققلك كل احلامك
ومتشكره اوى على تعليقك هو فعلا كل واحد بيعبر عن بيئته بس انا شايفه احيانا ان ممكن بيئه الانسان تكون كويسه وهو يبقي شخص مش كويس والعكس صحيح صحيح البيئه ليها عامل كبير في تكوين شخصيه الانسان بس احيانا كتير الشخص بيبقي عنده عزيمه كبيره انه يبقي احسن
وربنا يوفقك

tota_fm يقول...

بوس بوس

المشكله كبيره لان الاهل لما بيعملوا كده كتير بيخرجوا للمجتمع شخصيات ضعيفه
انا شايفه ان المفروض الاهل يغيروا من نفسهم في معاملتهم لولادهم بس دا بيبقي صعب في معظم الاحيان بس مفيش دلوقتى الا الامل ان الجيل الجديد يكون متفتح اكتر في التعامل واسلوب التربيه
ومتشكره اوى على تعليقك
وربنا يكرمك

بحبك يا مصر

انا سعيده جدا بتعليقك ومتفقه معاك جدا بس بيبقي الاهمال دا صعب اوى لان الطفل لما بيكبر بيبقي مجرد علاقته بأهله علاقه سطحيه او بيفضل طول عمره كرههم وبيتمنى يكون ليه اهل غيرهم ويبدا يبص لاصحابه اللى اهلهم مهتمين بيهم
متشكره اوى على تعليقك
ربنا يوفقك

tota_fm يقول...

صورصاره

ربنا يخليكى يا جميله فعلاانا معاكى ان الاهل المفروض يحسبوا نفسهم يا ترى هما صح ولا لا علشان اكيد هيتحسبوا علي ولادهم دول
وربنا يخليكى يا جميله على الكلام الحلو دا ربنا يوفقك دايما

بيبو

انا معاك ان الاهل كتير اوى بيبقوا فاكرين انهم صح في تربيتهم مع انهم بيبقوا بعيد جدا عن التربيه السليمه وفعلا لازم يفكروا في كلامهم لانه بيأثر فى الولاد بعد كده خاصه كلام الاحباط وتقليل الشأن
متشكره على تعليقك جدا

tota_fm يقول...

في القلب

ربنا يخليكى على كلامك الجميل دا انا متشكره جدا وربنا يكرمك

عاليا حليم

الله يسلمك يا جميل
انا متفقه معاكى في رأيك وفعلا موضوع الخوف علي ولادهم دا بيبقي سبب مشاكل كتير زى ان الولد او البنت بيخافوا يعملوا اي حاجه لانهم مجربوش انهم يحاولوا ويغلطوا ويقعوا ويقوموا تانى
ربنا يكرمك يا جميله ومتشكره جدا علي تعليقك

tota_fm يقول...

عروس البحر

متشكره اوى علي كلامك الحلو ويارب اكون عند حسن ظنك
وعندك حق ناس فاضيه
ومتشكره على تعليقك وربنا يكرمك

عاليا حليم

متشكره جدا على سؤالك يا جميل وربنا يخليكى وكله تمام الحمد لله وان شاء الله هكتب قريب وربنا يسهل
ربنا يوفقك ويكرمك يا جميله

Unknown يقول...

أنا ليا رائي في موضوع الاهل ده
الاهل مش وحشين ولا قصدهم وحش
لكن
الاهل معاندهمش منهج تربيه
الاهل لما كانوا صغيرين
ما حدش علمهم ازاي يربوا ولادهم
ولا علمهم ازاي النهج التربوي ده يبقى اسلامي صح
حضرتك
في يوم من الايام
هايبقى عندك اولاد
صدقيني
هاتربيهم غلط
لان انتي برضه ما حدش علمك ازاي تربي
طب والحل
ان انا
وانتي
وكل الناس اللي بيربوا او هايربوا
ندور
ونحاول نتعلم
ازاي نربي ولادنا
والموضوع ده فيه كتب كتير
زي منهج التربيه في الاسلام
او
المنهج التربوي في القران والسنه
وده موضوع كبير
انا ان شاء الله حاطوا في خطه الحمله
تعفي
حتى العقوبه
لها كيفيه
...................
اما هن المعاكسه
فده موضوع اكبر
جزء من الذنب فيه
الشباب
وجزء
البنات
وجزء
الاهل
انا مش عايز اطول
بس ان شاء الله قريب تلاقيني فاتح المواضيع دي
.......................
nb:
ياريت تشيلي الفيرفيكشن

§a§a يقول...

فين الجديد

tota_fm يقول...

انا انسان

انا مقولتش ان الاهل وحسين ولا قصدهم وحش انا اتكلمت في مبدأ ان احنا عادتنا وتقاليدنا ودينا بيقول ان حرام المعاكسه وانك تقف مع بنت وتكلمها وتفهمها انك بتحبها وانت بتتسلى ومع كده فى اهالى كتير بيشجعوا ولادهم على الموضوع ده وكمان المفروض ان الكدب حرام ومع ذلك فى اهالى كتير بخلوا ولادهم يكدبوا زي لو حد اتصل قول ماما مش موجوده طب دا كلام

انا معاك فعلا ان احنا لازم نقرا اصول التربيه ونعرف ازاى نربى ولادنا صح بس لازم نخلى بالنا لان الحياه مش ماشيه بالورقه والقلم فى حاجات كتير بتجد على مجتماعنا ومبادئ لازم نخلى بالنا منها
انا سعيده بتعليق حضرتك جدا ونورتنى

tota_fm يقول...

صاصا

الجديد وصل

مصطفى محمود يقول...

انا اول مرة ازور مدونتك توتا بس فعلا الموضوع جميل
لكنى كنت شايف انك تخلى كل مشكلة فى موضوع لوحدها وتناقشيها وتحاولى تقترحى حلول
بس جميل فعلا
واتمنى تكتبى مواضيع جديدة افضل

اعشق فى الليل ضوء القمر يقول...

هى مواقف تغيظ وتفرس
لكن كله متوقف على التربيه

بحبك يامصر يقول...

توتا
هى المواقف اللى تغيظ دى بتغيظك اوى كده لدرجة انك تتوقفى عن التدوين؟
وحشتينا جدا

ابو العربى يقول...

الموقف الاول ده موقف منتشر وبشكل كبير جداا ومش عارف حله ايه

اما المواقف الاخرى فهى ثقافه التربيه لابد ان يدرس الاباء ثقافه تربيه الاولاد ويكون فى نصائح على العامل النفسى للطفل ويتم تدريب الاباء والامهات على كيفيه المعامله

تحياتى

§a§a يقول...

فين التدوينات

انتى مخصمانا ولا ايه

لعلى مانع دخلوك وتدوينك خير

اعشق فى الليل ضوء القمر يقول...

على فكره عامل مفاجأه عندى أدخلى مستنيكى بسرعه

Unknown يقول...

غيابك طول اوى يا ريت تظهرى على السريع كده تطمنينى

Unknown يقول...

دى اول مرة لى هنا

بصى ياسيدتى دا لان مافيش اساس سليم للتربية
وكمان الكل عنده نظرة للغيرللتقليد الاعمى وما يحبوا انهم يكونوا منفردين فكر واسلوب خاص فى التربية
اما عن المعاكسات
فاصلاهم معندهمش مرجع دينى ولا اخلاقى

كل الود

Unknown يقول...

على فكرة ليكى وحشة يا توتا ايه الحكاية يا بنتى ؟

tota_fm يقول...

انا بعتذر لك الناس اللى مقدرتش ارد عليهم ومتشكره جدا لكل الناس اللى سئلوا عليا في غيابى بس موضوع غيابى حكايه طويله ان شاء الله احكيها لكم قريب